Кулың эш белсә, миллион алырга була.

Эшче һөнәрен үзләштерүчеләр арасында 27 июнь көнендә Казан шәһәрендә конкурс уза. Татарстанда җиңү яулаучыга ил күләмендә уздырылган бәйгедә катнашу хокукы бирелә. Җиңеп чыкса, бер  миллион сум акча бирәчәкләр. “Бәйге федераль этаптагы эшкә урнашу ярминкәсе кысаларында үткәрелә һәм эшче һөнәренең актуллеген арттыра”, - ди республика халкын эш белән тәэмин итү үзәге директоры Тимур Муллин.

Эш кирәкме, кирәксә, ил күләмендә уза торган хезмәт ярминкәсендә күңелеңә хуш килә торган эшне табарга була. Ул 27 июньнән башланып китәчәк. Әлеге эш базарында республика халкына 8 мең эш урыны тәкъдим ителә. Казан шәһәрендә хезмәт базары Урам паркында узачак. Апрель аенда төбәк күләмендә “Уникс” мәдәният сараенда хезмәт базары булып, анда килгән 7 меңе эшле булган. Бу хакта республика халкын эш белән тәэмин итү үзәге директоры Тимур Муллин хәбәр итә. 

“Россиядә эш” порталында 45 меңнән артык вакансия куелган. Татарстан Республикасы хезмәт, мәшгульлек һәм социаль яклау министры урынбасары Клара Таҗетдинова белдергәнчә, һәр теркәлгән эшсезгә республикада  16 эш урыны туры килә. Сәнәгать, төзелеш һәм транспортта квалификацияле эшчеләр 60 вакансия, ә йөртүчеләр – 34 вакансия арасыннан үз күңеленә хуш килгәнен сайлый ала. 

Республикада эшче көчләр җитми.  2019 елдан башлап республикада эшче көчләр саны арта башлаган. Үзмәшгульлек белән шөгыльләнергә теләүчеләр дә күбәя. 2019 елдан алып аларның  саны 70 меңнән артып китте, ә эшсезлек 30 меңгә кимегән,  40 мең кеше актив хезмәт базарына чыккан. Хәзерге вакытта республикада үзмәшгульләр саны  2 миллионнан артып китә. 

“Һәр өлкәдә дә кешеләр кирәк. Сәнагать тармагы өчен 12,7 мең  эш урыныннарын тәкъдим ителә. Аннан соң дәүләт секторы – сәламәтлек саклау, мәгариф, мәдәният һәм дәүләт хезмәте – якынча 5,5 мең вакансия. Төзелеш өлкәсенә дә эшчеләр кирәк. 5 меңнән артык эш урыны, сату, транспорт һәм авыл хуҗалыгы буенча эшләргә теләүчеләргә дә бар”, – дип белдерә Таҗетдинова.