«Янгын чыкканда, кызыбыз йоклаган булган. Ярый әле тәрәзә аша чыга алган...»

Үз тырышлыклары белән тергезгән, еллар буе шул нигезләрендә корган, бар тырышлыкларын куйшан Нурия һәм Илшат Галиевларның йорты, каралты-курасы янып беткән. Күршеләре да зыян күрган, ике катлы йортлары көлгә әйләнгән. Бистә халкының бердәмлеге аркасында гына ут башка йортларга күчми кала.

– Өебезнең нинди халәттә икәнен менә шушы фотолардан күрәсез инде, – дип сүз башлады Нурия апа. – Өй тулысы белән янып бетте. Эчке өлешләре генә калды. Чөнки ялкын эчкә төшмәде. Йортыбыз иминиятләштерелмәгән иде. Кызганыч, бүлмәләрдәге бөтен җиһазлар яраксызга әйләнде. Берсе дә калмады. Бистә халкы тырышлыгы белән генә башка күршеләребезнең йортларын саклап кала алдык. Үзегез беләсез, хәзер йортларны да тыгыз салалар бит. Ялкын телләренең башкаларга да күчү ихтималы зур булды. 

Нурия апа озак еллар Юдинода урнашкан 151нче номерлы мәктәптә башлангыч сыйныф укытучысы булып эшли. Ә ире Илшат элек йортларны төзекләндерү буенча оста булган. Хәзер исә шәхси бер фирмада зур йөк машинасын йөртә. Кызлары Таңсылу да әнисе кебек үк укытучы һөнәрен сайлаган. Кечеләре Ләйлә ялга лагерьга киткән. 

Янгын иртән чыккан, бу вакытта Нурия апа эш урынына БДИ комиссиясе составында эшләр өчен киткән була. Ә иптәше Илшат абый өй тирәсендә үлән чабып йөргән. 
–  Ирем газонокосилка ник эшләми башлады икән дип караштыра башласа, йортның икенче катына ут капкан булган. Безнең электр үткәргече бакырдан иде, аллюминийдан ясалганы нык куркыныч, диләр бит инде. Күршеләребез: "Болар идән ясыйлар бугай", дип уйлаганнар. Бер-беребезгә карап шулай алданганбыз. Ирем икенче катка күтәрелсә, икенче каттагы түбә янып ята икән. Безнең йортыбыз икегә бүленгән, бер ягында без, икенче ягында күршеләребез яши. Элекке КМПО заводының өйләре. Кызыбыз Таңсылу йоклаган булган. Илшат ишектән керә алмагач, кызым тәрәзә аша чыга алган. Документларны да алганнар. Күрешебез янгын сагы хезмәтенә 10.10 шалтыраткан. Залеснаядагы гына парк булган, машиналарында су булмаган. 10.50 дә генә ут сүндерүчеләр килеп җиткән. Җил белән ялкын ялмап алды ике йортны да. Менә хәзер хезмәттәшләрем килергә тиеш, исән калган әйберләрне барлыйбыз, кайсын ыргыртырга, кайсын юарга. Икенче кат ясалмаган иде, ә күршеләребез миллион акчалар түгеп икенче катны ремонтлаган, яңартты. Барысын да ут йотты. Дознавательләр килде, карады, аллюминий калган. Шуннан җылынган, диләр. 

– Тумышыбыз белән Балтач районы Куныр авылыннан, –-дип сөйләде безгә Нурия апаның апасы Халидә. – Киявебез Илшатның төп нигезе ул, кияүгә чыккач та, сеңлем бирегә килен буларак аяк басты. Никахлары да, туйлары да биредә үткәрелде. Шунда кызлары туды. 

Тамчы­дан күл җыела, диләр. Шуңа да әлеге гаилә тизрәк йортларын торгызу теләге белән яна. “Шәһри Казан”ны укучылар ара­сында ярдәм итәргә теләүчеләргә телефон номеры: Галиева Нурия Минлехановна Сбербанк, Тинкофф 89274066664. Галиев Ильшат Винирович, Сбербанк 89274092709 исеменә беркетелгән.