Баулыда спорт һәм мәдәният бәйрәме - «Яшь батырлар бәйгесе» гөрләп узды

Анда "Нефтьче" спорт сараенда сайлап алу этабында беренче һәм икенче урын алган 12-17 яшьлек 22 яшүсмер бил алышты, алар – Татарстанның Арча, Әлмәт, Балтач, Баулы районнары, Яр Чаллы, Казан шәһәрләре, Оренбург өлкәсенең иң көчле яшь көрәшчеләре. Баулы данын тренер Илдар Фатыйховта шөгыльләнүче 6 баулылы яклады.

Яшь көрәшчеләрне Баулы районы башлыгы Ильяс Гозәеров, Татарстан көрәш федерациясе башкарма директоры, милли көрәш буенча атказанган спорт остасы Марсель Таһиров, Россиянең атказанган тренеры, грек-рим һәм билбау көрәше буенча халыкара категорияле хөкемдар Рәис Садыйков, милли көрәш буенча атказанган спорт остасы, Татарстанның халык артисты Вил Усманов, Баулы районы көрәш федерациясе җитәкчесе Риф Васиков сәламләде. Баулы районы башлыгы Ильяс Гозәеров Баулыда спорт һәм мәдәният фестивале уздырырга тәкъдим иткән якташыбыз Вил Усмановка рәхмәт белдерде.

Физик тәрбиянең заманча методикаларын камилләштерүгә керткән өлешләре өчен, спортның милли һәм Олимпия төрләрен үстерүдә актив катнашканнары өчен, Баулы районы көрәш федерациясе җитәкчесе Риф Васиков һәм Баулы шәһәре 2нче спорт мәктәбе тренер-укытучысы Илдар Фатыйхов РФ федераль җыенының, Дәүләт Думасы депутатының рәхмәт хатлары белән бүләкләнделәр.

Бил алышулар республиканың иң талантлы яшь артистлары чыгышлары белән үрелеп барды. "Голос. Дети" телевизион шоу финалисты Сәид Галиуллин, "Созвездие - Йолдызлык" республика фестивале лауреаты Амелия Феофанова һәм башка яшь эстрада артистлары, тамашачыларга һәм көрәшчеләргә матур җырлар бүләк итеп, бәйрәмгә ямь өстәделәр.

Финал ярышлары кызганнан кыза барды, җанатарлар һәм тренерлар көч биреп тордылар. Кискен бил алышулар нәтиҗәсендә 11 авырлык категориясендә җиңүчеләр һәм призлы урыннарны алучылар билгеле булды.

Беренче урын алучылар: Камил Ганиев (Баулы), Артём Заврикиди (Баулы), Газинур Шиһапов (Арча), Әнгам Мөхетдинов (Арча), Айзат Газымов (Баулы), Михаил Соболев (Әлмәт), Фәнис Фәсхетдинов (Арча), Ислам Ганиев (Баулы), Аяз Хәйретдинов (Балтач), Рамазан Мөхәммәтгәрәев (Баулы), Илдар Низамов (Баулы).

Җиңүчеләргә кубоклар һәм сертификатлар тапшырылды. Фотолар монда: https://disk.yandex.ru/d/fVJZjKazZIeOxg 

Чыганак: Баулы-информ