200 балл “кесә”сендә, журналист булу хыялында

Шуларның берсе – Эльнара Сәйфиева, Казанның 121нче лицее чыгарылыш сыйныф укучысы. Татар кызы рус теле һәм рус әдәбиятын 100 баллга тапшырган.

- Мин Ташкент шәһәрендә гап-гади гаиләдә тудым. Кечкенәдән үк укырга яратам, нәни чактан ук С.Маршак һәм А.Барто әкиятләрен яттан белә идем. Әбием белән  урамга чыккач, беренче эш итеп, яңа хикәя җыентыклары эзләп, китап кибетләрен айкый идек, - дип искә ала Эльнара.

Китап укудан тыш, кыз 3 яшеннән профессиональ рәвештә бию белән шөгыльләнә. Моның өчен дә ул хәрәкәт һәм биюгә һәвәслеген күреп алган сизгер әбекәенә рәхмәтле. Булганнан барысы да була, диләр бит әле.  Эльнара очрагында бу нәкъ шулай. Инглиз телен өйрәнү дә аңа бик җиңел бирелә: 5 яшеннән ул лингвистик мәктәпкә йөри. 

Эльнарага берничә тапкыр яшәү һәм уку урынын алмаштырырга туры килә. Әнисенең кызына иң яхшы белем бирү теләге аларны Россиягә китерә. Иң зур теләкләре – Казанда яшәү,  әнисе 2014 елда  башкалабызда стажировкада булып кайта һәм шул чакта ук шәһәргә, биредәге мохиткә гашыйк була.  Әмма Татарстан башкаласына «барып җиткәнче» башта Первоуральскида (Екатеринбург) яшәп алырга, аннары берничә ел Әлмәттә торырга, шуннан соң гына бирегә килеп эләгәләр.

Эльнарада нәни чакта әдәбиятка һәм сәнгатькә уянган мәхәббәте олыгайгач та сүрелми, киресенчә, көчәя генә  бара. Башлангыч мәктәптә ул бәйрәмнәрне шигырьләр укып ачта, театр спектакльләрендә катнаша, алып баручы ролендә чыгышлар ясый. Өлкәнрәк сыйныфларда олимпиадаларда һәм әдәби-шигъри бәйгеләрнең актив катнашучысы була, хәтта лицей Президенты постына дәгъва кыла. 

Казанның 121нче лицеена килеп эләккәнче, кызга 5 мәктәп алмаштырырга туры килә. Әмма бу аның укуында бернинди тискәре чагылыш тапмый. Киресенчә, чыныктыра гына.

- Яшәү урынын күп тапкырлар алыштыру минем эчке сыйфатларымда чагылыш тапты: мин яңа мохиткә, әйләнә-тирәлеккә, вазгыятькә тиз җайлашырга өйрәндем. Һәм бу, минемчә, имтиханнарга әзерләнү процессына да уңай йогынты ясады, - ди кыз.

Бердәм дәүләт имтиханнарына әзерлекне ныклап торып 11гә күчкәч башлый. Ел җиңелләрдән булмады, ди ул. Имтиханга әзерләнеп, йокы туймаулар, “пробник”лардагы нәтиҗәләрдән канәгатьсезлек – барысы да башыннан кичкән. Сынауларга әзерлекне онлайн-мәктәп курслары ярдәмендә алып барган. Лицейда рус теле һәм әдәбияты укытучысы Флюра Гайфетдинова да үз предметларына гашыйк булган кызны күреп алып, әзерлектә зур ярдәм күрсәткән. Аның җитәкчелегендә Эльнара 200 балл иясе булып кына калмый, Бөтенроссия укучылар олимпиадасының төбәк этабында икеләтә призер да була.

БДИда 100әр балл туплаган рус теле һәм рус әдәбиятыннан тыш, база дәрәҗәдәге математиканы (5 баллга) тапшыра, шулай ук җәмгыять белеменнән сынау тота (нәтиҗәләре әлегә билгеле түгел). 

Кыз киләчәген журналистика белән бәйләргә тели. Укуга түгелгән көче хыялын тормышка ашырырга мөмкинлек бирер дип ышана. Казан яки Мәскәү югары уку йортларының берсенә керергә исәбе.