100 балл туплауның сере нидә? Үзе хафиз, үзе отличник

6 сыйныфтан соң әти-әнисе малайны Казанның 2нче лицей-интернатына укырга җибәрәләр. Бертуган абыйсы бу чакта инде Татарстан башкаласының югары уку йортында белем ала. Шуңа күрә чит-ят җиргә килеп эләкми Сөләйман. “Татарстанның иң яхшы мәктәбендә уку насыйп булды”, – ди ул.

Лицейда малай ныклап химия нигезләренә төшенә башлый. Нәкъ шушы юнәлешкә өстенлек бирүе дә очраклы түгел – әнисе педагог, мәктәптә химия укытучысы булып эшли. Бу предметка мәхәббәт тә кан белән күчкән, күрәсең. Тырышып укуы исә нәтиҗә бирми калмый: саллы уңышларга ирешә егет – өч тапкыр химия буенча төбәк олимпиадасында җиңү яулый. БДИда да  үз белемнәрен раслый – җиңеллек белән 100 баллны туплый.

-Бернинди репетиторлар белән дә шөгыльләнмәдем, лицейдагы химия дәресләре һәм олимпиада җыеннары – БДИга әзерлегем шулар булды, – дип сөйләде Сөләйман.

Химиядән тыш, егет база дәрәҗәдәге математика һәм рус теленнән имтихан тапшырган. Математикадан мөмкин булган 21 баллдан 20не туплап, ныклы “5”ле алган. Рус теленнән дә 70-80 балл тирәләре булыр дигән иде, шулай килеп чыккан да – 78 балл алуы билгеле булган.  Мәктәптән “алтын” белән чыгачак ул. 
Гомумән, Сөләйман бар яктан да уңган-булган – лицейда инглиз, төрек, испан телләрен үзләштерә ул.  Спорт белән шөгыльләнә: футбол, баскетбол, йөзү, шахмат – барысына да вакыты табыла!. Моннан тыш әле гарәп телен һәм Коръәнне өйрәнүен дә дәвам итә. Ике яшендә малай инде гарәп алфавитын белгән, Изге китапны үзлегеннән өйрәнүгә дә 5 яшендә керешкән икән. 7нче, 8нче һәм 10 сыйныфларда Сөләйман гарәп теле олимпиадаларында призер булган.

-Урта Әләзәндә 12 мәчет эшли. Әти-әни миңа кечкенәдән Коръәнгә мәхәббәт сеңдерде. Әтием – дини остаз, имам. Ул халыкара Ливия университетын тәмамлаган, гарәп телен камил белә һәм көндәлек тормышта аны актив файдалана. Алай гына түгел, бабам да имам булган, 90нчы елларда – Пенза өлкәсе мөфтие, – дип горурлык белән сөйли Сөләйман.

Мәктәптән соң Сөләйман, нәсел чылбырын дәвам итеп, дини-рухи юнәлештән китәргә ниятли. Баштарак бертуган абыйсы кебек медицина өлкәсен сайламакчы булган, әмма соңрак, гаиләсе белән киңәшләшеп, гарәп телен үзләштерүгә өстенлек бирергә булган. Моның өчен Гарәп Әмирлекләрендә мөмкинлекләр зур дип, егет шунда укырга кермәкче.

Фото: https://vk.com/wall-217079190_1413