Миңнеханов ТР белән Ингушетия хезмәттәшлегенең юл картасын төзү планы турында белдерде

«Безнең төбәкләр арасында мөнәсәбәтләр бик җылы. Ингушетия белән Татарстанның берничә зур предприятиесе хезмәттәшлек итә. Тулаем алганда, безнең төбәкләр арасында продукция сату күләмен арттыру һәм элемтәләрне ныгыту өчен зур потенциал бар. Аерым алганда, энергетика, машина төзелеше, газ-мотор техникасы сату, агросәнәгать комплексы, ИТ кебек өлкәләрдә», - диде Миңнеханов.

Республика рәисе кыскача гына Россиянең алдынгы һәм сәнәгый яктан алга киткән төбәге буларак Татарстанның икътисади потенциалы турында сөйләде.

Үз чиратында, Ингушетия башлыгы билгеләп үткәнчә, төбәк тәҗрибә тупларга ниятләгән тармакларны билгеләгән инде.

«Инвестицияләр җәлеп итү, территорияләр белән идарә итү, цифрлаштыру өлкәсендәге тәҗрибәгез – без үзебез өчен билгеләгән юнәлешләрнең бер өлеше һәм сезнең тәҗрибәне үзләштерергә телибез», – дип искәртте Мәхмүт-Али Калиматов.

Рөстәм Миңнеханов эшче төркем төзеләчәген әйтте. Бу юнәлешне җитәкләүне ТР Рәисе Администрация җитәкчесе Әсгать Сәфәровка йөкләргә ниятлиләр. Ә хезмәттәшлек юнәлешләрен җентекләп тикшерү өчен юл картасы төзеләчәк.

Чыганак: Татар-информ