Быелның 1 июленнән “эт хәсрәте” башлана

Татарстанда 1 июльдән этләрне теркәү кагыйдәләрен үтәмәгән өчен штраф салына.

Казанда 5 314 эт теркәлгән. Аларның 1 405е чиплаштыру узган. Теркәлгән җәнлек турындагы белешмә Бөтенроссия мәгълүмат базасына яки халыкара реестрга куела. Татарстанлылар үзләренең этләрен быелның 1 гыйнварыннан ук теркәргә тиешлеләр иде. Чиплаштыру җәнлекнең иминлеген тәэмин итә, ул югалган очракта эзләп табуны җиңелләштерә, халыкара күргәзмәләрдә һәм ярышларда катнашу мөмкинлеге бирә.

Быелның 1 июленнән башлап йорт этләрен теркәү һәм күп фатирлы йортларның гомум кулланыштагы урыннарында (ишегалды территориясендә) йөртү кагыйдәләрен үтәмәгән өчен җәза кертелә – кисәтү яки 2 мең сумнан 4 мең сумга кадәр административ штраф. Җәнлекне теркәү кагыйдәсе кабаттан да үтәлмәгән очракта, инде 5 мең сум штраф салына.

Казанда чиплаштыру һәм теркәү 6 дәүләт ветеринария клиникасында башкарыла.

Яңа кагыйдәләр буенча 2025 елның 1 гыйнварыннан соң туган көчекләр, туганнан соң 3 ай эчендә теркәү узарга тиешләр. 2025 елның 1 гыйнварына хәтле туган этләрне 2025 елның 31 декабренә кадәр теркәү сорала. Үсеп җиткән этне сатып алган очракта, теркәүне 30 көн эчендә үткәрү зарур. Әгәр эт Татарстанга вакытлыча, 30 көннән азракка, гына алып киленгән булса, бездә теркәү кирәкми.

Ветеринария клиникаларында эт хуҗасы үзенең паспортын, ИНН һәм ветеринария паспортын күрсәтергә тиеш. Ветеринария паспорты булмаса, аны шунда ук әзерләп бирәләр. Чиплаштыру җәнлекнең иминлегенә зыян салмый, операция 15 минут тирәсе вакытны ала.

Казандагы дәүләт ветеринария клиникалары, ял көннәрен дә кертеп, көн саен эшли. Кызыксындырган сорауларга 8 (843) 295-08-49 телефоны аша ачыклык кертергә мөмкин.

Кемгә – эт, кемгә – ит

Four Paws Бөтендөнья җәнлекләрне яклау оешмасы мәгълүматларына караганда, ел саен Азиядә, шул исәптән Вьетнамда 30 миллион этне ит өчен суялар. Вьетнамда эт һәм мәче ите деликатес санала. Корея “дәвалаучылары” фикеренчә, эт ите туберкулездан дәвалый икән.

АКШның Колорадо штатындагы Нортглен шәһәрендә йортта 4тән артык эт яки мәче тотарга рөхсәт ителми. Төньяк Каролина штатындагы Борбер шәһәрендә әгәр этләр яки мәчеләр урамда талаша башлый икән, әлеге җәнлекләр кичекмәстән “йоклатыла”, ә хуҗаларына штраф салына. АКШта йорт җәнлеге асрау өчен башта түләп лицензия алырга кирәк, әле эт асрау өчен ел саен хокук җыемы да түлисең.

Бөтендөнья сәламәтлек саклау оешмасы мәгълүматларына караганда, дөньяда 200 миллион тирәсе хуҗасыз эт һәм шул ук санда мәче бар.