Лагерьда балалар агуланган

Башкортстанның Стәрлебаш районындагы «Патриот» балалар лагеренда массакүләм агулану булган. 12-17 яшьлек 22 яшүсмер һәм 3 өлкән кеше зыян күргән. Бу хакта төбәкнең Сәламәтлек саклау министры Айрат Рәхмәтуллин үзенең телеграм-каналында хәбәр итә.

- Кичә кич Стәрлетамакның йогышлы авырулар үзәгенә берьюлы 25 пациент китерелде. Болар – Стәрлебаш районы балалар лагерьларының берсендә ял итүчеләр һәм әйдаманнар. Аларның 22се – бала һәм 3се – өлкән кеше, - дип язган ул. 

Рәхмәтуллин шулай ук ачыклык керткәнчә, тикшерүдән һәм ярдәм күрсәтүдән соң 9 кешене өйләренә кайтарып җибәргәннәр. Тагын 16сы хастаханәдә калган. Аларның хәле уртача авырлыкта дип бәяләнә,  яхшыруга таба бара. Агулану сәбәпләре төгәл билгеле түгел. Агулану факты буенча тикшерү башланган. Учреждениедә азык-төлек продукциясе, эчә торган су, җиһазлар өслекләреннән үрнәкләр алынган. Санитария нормаларының үтәлеше һәм кирәкле документларның булуы тикшерелә.