Җырчы Айдар Галимов: “Бер тапкыр әнине алдадым”

Килешмичә дә булмый, Айдар Галимов дистә еллар тамашачыларына иҗатын бүләк итә.

– Айдар абый, сез дистәләгән еллар сәхнә тотасыз. Бу да популярлык билгеседер. Әмма җырчының абруе дигән төшенчә дә бар. Нәрсә мөһимрәк соң: абруймы әллә популярлыкмы?
– Популярлык еллар узу белән арта дип әйтә алмыйм. Еллар белән бергә буыннар, тамашачылар үзгәрә. Популярлык концерт, бәлки, аларның санына кагыладыр. Ә менә абруй еллар дәвамында яулап алына. Дөрес, вакытында популярлыгы да кирәк. Абруйлы булу өчен син барыбер тамашачыга танылырга тиеш. Иң яхшысы популяр, абруйлы артист булудыр. Әлбәттә, абруй кыйммәтрәк бәяләнә.

– Эстрадада тәҗрибәгез зур булгач, үткән белән бүгенгене дә чагыштырмый мөмкин түгел. Хәзер яшьләргә сәхнәгә килү җиңел диләр. Килешәсезме?
– Әлбәттә, хәзер мөмкинлекләр күбрәк. Әмма хәзер дә яшьләргә җиңел дип әйтмим. Без сәхнәгә килгән вакытта да кыенлыклар бар иде. Тик шулай да монда Аллаһы Тәгаләнең ярдәме, язмыш, тәкъдирсез дә булмагандыр. Мин беркайчан сәхнәгә килү юлларын эзләмәдем. Башта автотранспорт техникумына укырга кердем, аннан армия, аннан юридик факультет. Һәрвакыт җыр шөгыль генә булыр дип уйладым. Соңыннан бу юлның үзенә алып кереп киткәнен сизми дә калдым. Димәк, язмыштыр. Миннән сәләтлерәк кешеләр дә булгандыр, әмма һәркем дә зур сәхнәгә чыкмаган бит.

– “Сәхнәдә барысын акча хәл итә”, – дигән сүзләрне яратып кулланабыз. Элек тә шулай идеме?
– Элек безнең акча белән сәхнәгә юл ярырга акчабыз да булмады. Заман, кыйммәтләр дә башка иде. Шулай да: “Барысын акча хәл итә”, – дип әйтәсем килми. Дөнья акчага гына корылмый. Әйе, иҗатның башлангыч чорында акча ярдәм итәдер бәлки, әмма ул артист барыбер иләк аша үтә. Бөтен халыкны да сатып алып булмый. 

– Айдар абый, сез күп артистларга канат куйган кеше дә. Заманында төркемегездә мәрхүмә Вәсилә Фәттахова да эшләде. Бик сәләтле иҗатчыларны туплап торасыз. Ә ни өчен алар төркемнән китәләр?
– Алар китмәгән булса, без төркем генә түгел хор булыр идек (көлә). Мин аны мактанып әйтмим, чыннан да сәхнәдә тәүге адымнарын “Айдар” театр-студиясендә ясаучылар бихисап. Һәрберсе ниндидер дәрәҗәгә кадәр үсеп китеп барды. Матур итеп китмәүчеләр дә булды, нишләтәсең инде тормыш бу. Күңелдә уелып калган очраклар бар, тик алар күп түгел. Тулаем алганда үз юлларын башлап җибәрүче, ниндидер дәрәҗәгә ирешүчеләр күбрәк булды.

– “Җырларның сүзләренә күбрәк игътибар итәм”, – дип әйткәнегез бар. Җыр базары турында уйланырлык җирлек бармы?
– Дөрес, җырларның сүзенә игътибар итәм. Бу кимчелекме әллә өстенлекме белмим. Шәп башкаручы, яхшы аранжировка, көй булса да, әгәр җырның сүзләре килде-китте икән, ул озын гомерле булмаячак. Хәзер авторлар да үзенчәлекле эшлиләр. Бер җырны 20ләп кешегә җибәрәләр. Егерме кешенең һәрберсе дә җавап бирми, билгеле. Кемгәдер җыр ошап бетми, кемнеңдер игътибары җитмидер. Мин элек тә бик сайлана идем. Шундый күп җырларга заманында игътибарым җитмәгән. Мәсәлән, “Туган як”. Ул җырны тыңладым да, Вәсиләгә бирдем. Тагын бер җыр – “Яшьлегем чишмәләре”. Бу җырның авторы – Таһир Асылгәрәй минем төркемдә эшли иде. Аны берничә тапкыр тәкъдим итте. Белмим, нишләптер, ул вакытта аңа игътибар итмәдем. Җыр популярлашкач: “Бу минем күңел хәләтенә туры килә торган җыр булган икән”, – дип уйлап куйдым. Менә шулай берничә хит минем янымнан үтеп китте. Ләйсән Гыймаева җырлаган саен “эх” дип әйтеп куям (көлә). Бу җырларның язмышы шундый булган, күрәсең.  

Дәвамы бар