Ризат Рамазанов бал кортыннан шүрли. Яки җырчылар нәрсәдән курка?

13 июнь көнне алтын камкалар көне билгеләп үтелгән икән. Әлеге бөҗәкләрне, сүз уңаеннан, төрле җирләрдә төрлечә атыйлар: чуар таракан, камка, фатыйма, камкамач... 

Алсу Абульханова, Татарстанның халык артисты: 

– Бер бөҗәктән дә, кимерүчедән дә курыкмыйм, әмма үрмәкүчне кулыма ала алам, дип әйтә алмыйм. Өйдә очрасалар, аларга тимәскә кушалар. Комачауласалар, чүпрәк белән алып балконнан урамга чыгарам. Фобияләрем дә юк кебек. Элек очкычта очарга курка идем, хәзер исә МРТ узганда гына бераз каушыйм. Үземне үзем тынычландырырга тырышам андый вакытта. “Түзәргә кирәк”, – дип сөйләшеп ятам үзем белән, булыша.

Ризат Рамазанов, Татарстанның һәм Башкортстанның атказанган  артисты:

-“Бабка-коробка” дип йөртә идек бу матур бөҗәкне. Әллә нәрсә куркулар, фобияләр юк үзе, тик бал кортыннан шүрлим. Кечкенә чакта әтинең әти-әнисенә, ягъни әби-бабайларның күршеләрендә умарта бар иде. Һәр җәй саен чакмый калмыйлар иде, нәкъ башка туры китереп, эләктереп алалар иде. Шуннан бераз курку калган әлегә кадәр. Әәә, биеклектән бераз шүрлим икән әле, түбәдә йөри алмыйм. 

Лилиана Газизова, җырчы: 

- Әлеге сүзне еш кулланмасам да, бу бөҗәкне “Камка” дип йөртәм... Аллага шөкер, фобияләрем күп түгел, әмма бераз шүрләткән ситуацияләр бар. Мисал өчен, зур үрмәкүчләрдән куркам. Кечкенә чакта авылда йокыдан торышка күз алдымда пәрәвезгә ябышкан зур, йонлач үрмәкүч эленеп торганын хәтерлим. Минем акырган тавышка ул үрмәкүчнең йөрәге ярылгандыр (көлә). Шулай ук биеклектән куркам. Моның шулай икәнен Нью-Йоркта кыяга басып, клипка төшкәндә аңладым. Сүз уңаеннан, мине иске лифтлар да куркыта. Шуңа күрә еш кына баскычтан йөрергә тырышам.

Гөлүс Хәбибрахманов, җырчы:

- Бу бөҗәкне “Божья коровка” яки “Камка” дип йөртә идек бала чакта, әле дә шулай. Фобияләрем юк, бернидән дә курыкмыйм (көлә)! Элек судан да, биеклектән дә курка идем, хәзер – юк. Бик биеккә менсәм генә инде, малай.

Рәфис Кәлимуллин, җырчы:

- Бездә бу бөҗәкне “Камкамач” диләр. Кортлардан, бөҗәкләрдән шүрлим, тик артык алай куркам дип әйтмим. Мин еш кына урманда йөрим, балык тотарга яратам, ә анда исә нинди генә бөҗәк очрамый, сакланырга кирәк булган очраклар да килеп чыгарга мөмкин. Барыбызга да игътибарлырак булырга киңәш итәм.

Рөстәм Асадуллин, җырчы:

-“Бабка-коровка” дип йөртә идек кечкенә чакта, башка исемнәрен белмим. Бөҗәкләрдән куркам дип әйтә алмыйм, әмма җирәнәм. Мәсәлән – җирән тараканнардан. Фобияләрем юк та бугай, бернидән дә курыкмыйм.

Мәрьям, җырчы:

- Бу үзенчәлекле бөҗәкне балачакта “Фатыйма” дип атый идек. Үрмәкүч ише җан ияләреннән курыкмыйм, мин авылда үскән бала бит. Шуңа күрә бер бөҗәкне дә рәнҗеткәнем, җәберләгәнем, бәреп үтергәнем юк, хәтта – чебенне дә (елмая). Тараканнардан, суалчаннардан җирәнәм, сүз дә юк. Кипрда бик эсселәр башлангач, зур тараканнар чыга башлый, бер дә яратмыйм шуларны. Тәрәзә ачык калса, очып керергә дә мөмкиннәр. Сүз уңаеннан, элек еланнан куркам дип йөри идем, берсендә бассейныбызда йөзеп йөргәнен күреп алдым, басуга чыгарып җибәрдем. Димәк, аннан да курыкмыйм. Фобияләргә килсәк, тар, кысынкы биналарны яратмыйм, тын бетә. Шулай ук кеше күп булып җыелып торган урыннарда йөрү ошамый, андый җирләргә сирәк йөрергә тырышам. Иркенлекне яратам!

Миндияр Шәймарданов, җырчы, алып баручы:

-Балачакта “Бабка-коробка” дип көйләп йөри торган идек. Бөҗәкләрдән шүрләмим үзе, ләкин май коңгызыннан бераз куркам: үзләре зур, үзләре очалар... Башка фобияләргә килсәк, бака белән еланнан куркам. Аларны күрсәм, хәтта каз тәннәре чыга. Фу, җирәнгеч (көлә).