Марат Шәйбәков: “Быел менә беренче мәртәбә без аерым... Кем уйлаган бит”

Уртак сукмактан янәшә атлаган еллар эчендә алар беренче мәртәбә бу көнне аерым үткәрәләр. Мәгълүм булганча, Марат Шәйбәков әлегә хастаханәдә, йөрәгенә ясалган катлаулы операциядән соң тернәкләнү чорын үтә. 
– Моңа кадәр һәр бәйрәмдә гел бергә идек, быел менә беренче мәртәбә без аерым... Кем уйлаган бит шушы хәлләр килеп чыгар дип. Ләйсәннең юбилеен 11 июль көнне үткәрергә план корып, ресторан белешеп, кунаклар чакырып, инде аванс та түләп куйган идек. Аның туган көне бүген – ул 7 июльдә кичке якта туган, әби шулай дип сөйли. Иртән йокыдан уянгач та шалтыратып котладым, иртәнге сәгать алты да тулмаган иде әле. Сезнеңчә иртәнге сәгать дүрт була ул. Курьер белән чәчәк бәйләме җибәрдем. Терелеп чыга алсам, сиңа үзем зур бүләк булам, дидем. Менә җомга көнне өйгә чыгармаслармы дип торам инде, туйдым хастаханәдән, гаиләм янына кайтасым килә. Балалар авылда анысы, әбидә. Ләйсән бүген беренче көн отпуск ялында. 24 июньнән бирле шушында ауныйм, арыдым. Быел ял итәргә дә барып булмас, көзге якта берәр шифаханәдә генә саулыкны ныгытырга исәп. Күз күрер инде, план корырлык түгел әле хәлләр, иртәгә ни буласын да белмәгән, дигәндәй. Исән-сау яшик, – ди Марат Шәйбәков.

Ә без исә аның тернәкләнеп җитүен телибез, Ләйсәнне исә гомер бәйрәме белән котлыйбыз!