«Әти-әни күңеле бары сизә инде»: тагын бер артист улын армиягә озаткан

Артист гаиләсендә өч егет тәрбияләнә: Илдан, Вилдан һәм Ризван. Мәдинә Гайнуллина белән хәбәргә чыгып, хәл-әхвәл белештек.
– Нинди генә ананың, илдә булган вәзгыятьне белә торып, борчуы булмасын икән. Элек тә әти-әни уллары өчен борчылган. Әмма хәзерге үзгәрүчән тормышта дулкынлану тагын да көчәя. Улыбыз Илдан кадетлар мәктәбен тәмамлады, аннан механик-инженер һөнәрен алды. Диплом алды да, берничә көннән армия сафларына китте. Илдан бик дулкынланды, әмма хисләрен безгә күрсәтмәскә тырышты. Әти-әни күңеле бары сизә инде. Әлмәттән Казанга киткәндә борчылуы бар иде әле, ә менә форма киеп, поездга утыргач, егетләрнең йөзләрендә елмаю күрдем. Әле хәзер дә күз алдымда хәрби форма кигән яшь егетләр тора кебек. Күңелем тула.

– Улыгыз кайда хезмәт итә?
– Екатеринбург якларына эләкте. Ул инде автобустан тыш бөтен машина йөртү категорияләренә дә укып бетергән иде. Аны транспорт белән бәйле частька куйдылар.

– Элек солдатка озату белән бәйле матур йолалар бар иде. Сезнең мәҗлес ничек үтте?
– Солдатка озату моңсу да, күңелле дә мәҗлес. Улыбызны озатырга бик күп яшьләр килгән иде. Үзем өчен яңа йола ачтым әле, моңа кадәр күргәнем булмады. Яшьләр Илданны урындыкка утырттылар да, һәрберсе чәч ала торган машина белән бер юл узып, чәч алды. Элегрәк әби-бабайлар хәрби хезмәткә китә торган егеткә ипи каптырып, калган ризыгын төреп куя торган булганнар. Без алай эшләмәдек. Аллаһ Тәгалә ярдәменнән ташламасын инде. Без һәрвакыт догада. Илебездә тотрыклы, тыныч заманнар булсын иде дип телибез. Гел үзгәреп торучы кануннар армиягә киткән балаларга да кагылырга мөмкин бит. Армиядән кайткач, тормышлары ничек буласын да алдан әйтә алмыйбыз. Менә шуны белеп яшәү кыен, ут йотып торабыз.