Алсу Абульханова ашаусыз тора ала, чәйсез – юк.

Календарь битләрендә 20 июнь һәм бүген чәй янына тәмлүшкәләр алу көне билгеләп үтелә. Ә танылган җырчыларыбыз чәйне гадәттә нинди тәмлүшкә белән эчә? Әлеге эчемлекне ничек ярата: сөтле-сөтсезме, шикәрле-шикәрсезме? Гомумән, нинди чәйләр ошый аларга? Барысын да белештек, хәзер сезгә дә сөйләрбез.

“Иң тәмле чәй ул – гаилә белән җыелышып, кыстыбый яки өчпочмак белән эчкән чәй”,– дип сүз тотты Рәфинә Ганиуллина. “Күпчелек вакытта Рәзил сөтләп эчә, мин – сөтсез. Кайвакыт яшереп калдырган шоколадыбыз булса, балаларны бакчага-мәктәпкә озаткач, икәү генә утырып, тәмләп чәй эчкән вакытлар да була”,– дип елмая җырчы.

“Кара чәйне дә, яшелен дә яратам. Элек әлеге эчемлекне сөтсез эчә идем һәм шикәр белән, ә хәзер киресенчә, сөт белән, шикәрсез. Иң мөһиме – хатыным ясап биргән чәйне генә эчә алам”,– дип тезеп китте Гөлүс Хәбибрахманов. “Ашап бетереп, көтеп утырсам-утырам, хәләл җефетем ясап бирмәсә чәйне, эчмим”,– дип шаярта җырчы.

Асылъяр чәйнең төрлесен ярата, бигрәк тә мәтрүшкәлесен һәм сырганаклысын. “Мин талымланып, сайланып тормыйм, чәй янына нәрсә бар – шуны ашыйм. Гадәттә, үзем пешерәм. Иң мөһиме – көн саен чәйләрне туганнар һәм якыннар белән бергәләп эчү!”,– ди җырчы.

Миндияр Шәймарданов чәйне гөбәдия белән тәмләп эчәргә ярата, ә сөтле чәйне бөтенләй җене сөйми. Ни кызык, кечкенә чагында күп итеп сөт эчеп, җырчы әлеге эчемлектән бизгән булып чыкты. “Сөтне каһвәдә генә эчә алам. Шулай ук шикәрне бик үк чәйгә салырга тырышмыйм. Чәйләргә килсәк, үләнлеләрен яратам: бөтнек, мәтрүшкә салынганын”,– дип йомгаклый фикерен алып баручы.

Ләйлә Галиева да күп кенә татарларга хас булганча, сөтле чәй ярата. “Кибетләрдән ябыктыра торган печенье эзләп, сатучыларны көлдертәм. Кызганыч, андыйны таба алмыйм”,– дип шаярта җырчы. Ләйлә үзен тәмлүшкәләр буенча чикләми. “Фигура өчен зарарлы булса да, тәмле кәнфит-печеньелар белән берничә тапкыр утырып чәй эчәм”,– ди ул.

“Өйдә нинди генә чәй юк миндә. Кунакларымны гел чәй белән сыйлыйм. Шәхсән үзем, бөтнек, лимон һәм петрушкалы кара чәй яратам”,– ди Лилиана Гәзизова. Кәнфит-печеньелар урынына кипкән җиләкләр ашарга тырышуын да ассызыклый җырчы. “Кунаклар булса, татлы десерттан баш тартканым юк. Ә кунаклар бездә еш була. Сез дә килегез”, - дип Америкага кунакка дәшә Лилиана.

Алсу Абульханова безнең соравыбызга исә Канададан, Монреаль шәһәреннән җавап кайтарды. Җырчы чәйне үлеп ярата булып чыкты. “Чит илгә киткәндә миңа чәй җитми. Төрле соклар, башка эчемлекләр сусауны басмый. Миңа кап-кайнар сөтсез чәй кирәк, аз гына суынса да эчә алмыйм”,– дип шаккатыра Алсу. Торт, кәнфит, пирожный сыман тәм-томнарга җырчы шулай ук мөкиббән. “Бал һәм өрек белән эчәргә яратам әлеге эчемлекне. Ашаусыз тора алам, чәйсез тора алмыйм”,– дип белдерә Алсу Абульханова конкрет рәвештә.

“Кайсы якта сөт белән эчәләр – шунда сөт белән эчәм, кайсы якта сөтсез – шунда сөтсез эчәм чәйне”,– дип сүз тотты Рәфис Кәлимуллин. Җырчы чәйне күптәннән шикәрсез, әмма бал белән эчә булып чыкты. “Татар халкы чәйсез тора алмый. Чәй түгел, аның янындагы тәмлүшкәләр тазарта. Шуңа күрә симермәс өчен чәйне кәнфит-печеньесыз эчәргә тырышам”,– ди Рәфис.