Путин Миңнеханов тәкъдим иткән тагын бер идеясен хуплады

Россия Президенты Владимир Путин Татарстан Рәисе Рөстәм Миңнехановның мәктәпләр һәм балалар бакчалары төзелеше нормативларын үзгәртү тәкъдиме белән килеште.

Дәүләт башлыгы РФ Дәүләт Советы Президиумының «Тормыш өчен инфраструктураны үстерү турында» утырышы нәтиҗәсендә тиешле йөкләмәләр бирде. Утырышта проблемага игътибарны ТР Рәисе юнәлтте.

Аерым алганда, түбәндәгеләр күздә тотыла:

төбәк хакимиятләренә торак төзелеше проектларын гамәлгә ашырганда социаль инфраструктура объектларын төзү вакытын кичектерү хокукы бирергә;
социаль инфраструктура объектлары кыйммәтләнүгә юл куймас өчен төзелешкә карата таләпләрне үзгәртүгә биш елга кадәр мораторий билгеләргә;
социаль инфраструктура объектларыннан файдаланучы гражданнар саныннан, гражданнарның мобильлек дәрәҗәсеннән һәм транспорт хезмәтләре белән тәэмин ителешеннән, демографик фараздан чыгып, социаль инфраструктура объектларыннан файдалану мөмкинлегенә карата шәһәр төзелешен проектлау нормативларын үзгәртергә (төбәкләр мондый объектларның җәяү һәм транспортта хәрәкәт итү үзенчәлекләрен билгели алачак);
кысан шәһәр төзелеше шартларында мәктәп биналарын төзү һәм реконструкцияләүгә карата санитар-эпидемиологик таләпләр билгеләүгә һәм куллануга карата дифференциацияле алым кулланырга (шул исәптән аларны җир кишәрлекләренең мәйданын арттырмыйча гына реконструкцияләү өчен).
РФ Хөкүмәте һәм Дәүләт Советының Миңнеханов җитәкләгән «Тормыш өчен инфраструктура» комиссиясе бу һәм башка мәсьәләләр буенча тәкъдимнәрен агымдагы елның 15 июненә җиткерергә тиеш.

Чыганак: Татар-информ