Кальций сиптем дип тынычланмагыз!

Ярыймы, ярамыймы, белмибез. Помидорлар төшмәсә эчетке сибәбез. Помидор очлары бозыла башласа, кальций кирәген ишетеп, кибетләрдән кальций сүзе язылган ашламалар җыярга тотынабыз.  Помидор үстерү буенча шактый тәҗрибә туплаган Эля Шталь белер-белмәс ашлама кулланмаска куша. Аның киңәшенә колак салыгыз әле. 
Хелат кальций белән кальций нитраты (селитра) нәрсә белән аерыла? Хелат кальций һәм кальций нитраты икесе ике төрле ашлама, һәрберсенең үз үзенчәлеге бар.

Хелат кальций - органик кислотаның тозы, ул кальцийны “тотып” тора һәм кальцийны башка матдәләр белән реакциягә керүдән саклый. Шуңа күрә кальцийны үсемлек тулысы белән үзенә сеңдерә ала. Бу ашлама бары кальций  буларак кына кулланыла, анда башка туклану элементлары юк. Мәсәлән, аны азот белән артык тукландырылган помидор сабаклары юан булып үскәндә, помидор очында черек (вершинная гниль) барлыкка килгәндә үсемлекләрне дәвалау өчен кулланалар.

Кальций нитраты - суда эри торган ашлама, анда нитрат азоты һәм кальций күп. Азот үсемлекне утыртканнан соң, яшел масса формалашканда кирәк, ә кальций аны үсемлекләргә үзләштерергә ярдәм итә. Кальций нитраты белән помидорларны үсеш чорында тукландыру черек һәм гөмбәле авырулардан саклану өчен кирәк.  

Шулай итеп, төп аерма шунда, помидорларыгыз “симерә” яфракка котыра, помидор очларында черек хасил була икән, хелат кальций сибәргә. Мондый вакытта азотлы ашламалар гомумән бирергә ярамый, ул тагын да котырып үсүенә китерә. Ә кальций нитраты үсемлекне гомуми тукландыру һәм киләчәктә авырулардан саклау нияте, яшел массаны үстерү өчен тәрәзә төбеннән туфракка чыгарып утырткан вакытларда гына кулланыла. 

Кальций нитратын нәрсәләр белән кушарга ярамый?
Кальций нитратын фосфор һәм күмерт булган ашламалар белән кушмыйлар. Шулай ук аны органик ашламалар һәм реакцияне үзгәртүче матдәләр, үсеш стимуляторлары һәм фунгицидлар белән бергә кулланмыйлар. Кальций нитраты башка нитратлар белән (аммиаклы, калийлы, магнийлы), шулай ук карбамид (мочевина) белән дә кушарга була. Сульфатлар (калий һәм магний) һәм фосфатлар (монокалийфосфат) белән бергә кулланырга ярамый.