Гүзәлия Хөснетдинова: «Мин һәр эштә дә ике елдан артык тоткарланмыйм»

Күпләр аны үзенчәлекле образлары, кызык видеоязмалар аша белә. Гүзәлия Хөснетдинова белән артистлар, заманча мөнәсәбәтләр һәм яшьләр турында сөйләштек. 

– Гүзәлия, син кай тарафларда хәзер? Нәрсә белән шөгыльләнәсең?
– Дөресен әйткәндә, мин бөтен җирдә. Артист тормышын, үземнең шәхси блогны алып барам, складта товарлар да җыям, рилсмейкер булып та, биюче, администратор булып та эшлим. Моңа өстәп вакыт булганда матраслар сата торган кибеткә, чәчәк сата торган кибеткә дә чыгып керәм. Эшнең ояты юк. Бер ай эшсез булдым. Менә Аллаһы Тәгалә эш биргәч, берсеннән дә оялып тормыйм, эшлим. Мин һәр эштә дә ике елдан артык тоткарланмыйм, гадәттә. Барысын өйрәнеп беткәч, эшнең кызыгы бетә кебек. 
 

– Бу сүзләр хәзерге заман яшьләренә бик туры килә. Шулаймы?
– 25 ел бер үк җирдә хезмәт куйган кешеләргә шаккатам. Әле хезмәт хакы да артмый икән, димәк, алга атларга кирәк. Күпләр яхшырак эш таба алмаудан, билгесезлектән курка. Әгәр эш, хезмәт хакы канәгатьләндерми икән, нәрсәдер үзгәртергә кирәк. Мин уңышсызлыктан да курыкмыйм. Хәзер инде курка торган яшьтә түгел. 

– Рамил Шарапов төркемендә эшли идең. Төркемнән ник киттең?
– Рамил Шарапов командасына килгәнче биюче буларак кына чыгыш ясый идем. Ә бу төркемдә төрле рольләр дә уйнарга туры килде. Мәдәният институтында театр кафедрасын тәмамлаган кеше буларак, әлбәттә, моңа да сөендем. Рамилгә дә карашым үзгәрде, ул бик тырыш, гел эшлим, дип тора торган кеше икән. Аңа сокланып карадым. Рамил турында бер начар сүз дә әйтә алмыйм, үпкәләшмәдек алай. Ул бик таләпчән кеше, ә мин үземне ниндидер кысаларга керткәннәрен яратмыйм. 

– Гел чәч төсен үзгәртеп торасың. Башкалардан аерылып торган төсләргә игътибар итәсең. Нәрсә эзлисең? 
– Нәрсәдер эзлим дип әйтә алмыйм. Чәчләремә түзгәннәре өчен рәхмәт анысы (көлә). Күптән түгел генә чәчне буяган идем, ошамады, тагын буядым. Тиз туям, шуңа үземнең образны гел үзгәртеп торам. Тормышта да шулай ук дип әйтә алмыйм. Чәчем светофор кебек үзгәреп торса да, мисал өчен, йортта барысы да бер төстә булуны яратам: минимализм. Нишләптер егетләр дә чәчәкне чәч төсенә карап сайлый, төрле төстәгеләрне алып киләләр. Ә мин, киресенчә, бертөслене яратам.  

– Әти-әниләрең тышкы кыяфәтең үзгәреп торуга нинди карашта?
– Әлбәттә каршы. Әни гел: “Табигый матурлыгың бар бит”, – дип әйтә. Минем күңелем шулай кушкач, бернәрсә дә эшләп булмый инде. “Мин синең белән сөйләшмим”, – дип ябырылганнары юк, анысы өчен дә рәхмәтлемен. 

– Гүзәлия, әти-әниләрең дә иҗади кешеләрме?
– Әти юмор хисле кеше, әни бераз тыйнаграк ул яктан. Икесе дә гап-гади кешеләр, лаеклы ялда инде. Әни социаль хезмәткәр булып эшләде. Әти әле дә механизатор булып эшли. 

– Син балачактан ук башкалардан аерылып тордыңмы?
– Шук бала идем. Мәктәптә укыганда кызларны егетләр кимсетсә, миңа килеп әйтәләр иде. Малайлар белән сугышкан да булды. Балачакта еш кына почмакта басып тордым. Мин өйнең шул почмагында пропискага кергән булганмындыр (көлә). Әле ярый почмакка бастырганнар. Хәзер балаларга барысы да рөхсәт. Үземнең балаларым юк әлегә, әмма мин бик таләпчән әни булырмын дип уйлыйм. 

– Мондый ут кызга игътибар итмичә калып та булмый. Ни өчен йөрәгең буш? Сайланасыңмы?
– Баш зәңгәр булгач, игътибар итмәү кыендыр ул. Тик беләсеңме, мин ни өчендер сәеррәк кешеләрнең игътибарын җәлеп итәм. Юрганыңа карап аягыңны суз, диләр. Менә алай түгел икән. Мин үзем кешеләрне аермыйм, шуңа күрә, бәлки, миңа әллә кемнәр тартыладыр да. Дөрес, эмоциональлегем дә бар, гел үзем өчен җавап бирергә дә күнектем. Ә ир-атлар күп очракта йомшаграк холыклы кызларга игътибар итә. Йә аралаша башлыйбыз, барысы да яхшы кебек, әмма вакыт узгач, егетләр мине үзләренә яраклаштырып үзгәртергә тырыша башлый. Минем белән бер дулкында булган кешене очратасы килә. Әлегә йөрәгем буш. Бер елдан артык мөнәсәбәтләрдән ял итәм. Элек язып торучылар, нәрсәдер өмет итеп йөрүчеләр бар иде. Бер мизгелдә барысы белән дә элемтәләрне өздем. Беләсеңме, шундый рәхәтлек, җиңеллек, тынычлык сиздем.

– “30, 40, 50” проектында син яшь буын вәкилләренең фикерен тәкъдим итәсең. Яшьләр арасында мөнәсәбәтләр нинди ул? 
– Егетләр ялкаурак хәзер. Бер егеткә ун кыз туры киләдер, шуңа күрә артык тырышып торуның мәгънәсен дә күрмиләр. Хәзер кызлар да көчле, үз-үзләрен тәэмин итеп торалар. Әлбәттә, кызлар: “Мин болай да үземне киендерәм, тамагымны туйдырам. Егет белән мөнәсәбәтләргә керсәм, мин үземне тагын да яхшырак хис итәргә тиешмен”, – дип уйлый. Ә күп кенә егетләрнең хәтта максатлары да юк. Мин фатир, машинаны бергә алу мөмкинлеген дә кире какмыйм, әмма егетләр бөтенләй битараф. Элеккеге сөйгән ярым: “Машина да, фатир да кирәкми. Минем үз рәхәтемне күреп яшисем килә”, – диде. Бу егет 30дан узган бит... 
Мин, мәсәлән, шәһәрдән читтә торам, егетләр хәтта очрашырга килергә дә иренә. Ерак диләр. “Яхшы егетләр юк”, – дип әйтмим. Бар алар, әмма аз. Белмим, миңа ярамаган ир, бәлки, кемдер өчен идеалдыр. Мин әле генә сайлана башладым. Элек мине ошаткан кешеләр белән аралаштым. Кимчелекләрен күрсәм дә, аларны акларга тырыштым. Хәзер егетләре дә: “Мин бу юлы беренче яздым, икенче тапкыр син язарга тиеш”, – дип тә уйлый. Монысы нинди “мода”дыр тагын. Мин, гомумән, егетләргә беренче язмыйм. Монысы инде шәхси принцип. Тагын бер кызык күзәтүем: хатын-кыз “мин бу егеткә туры килмим”, – дип үзенә читтән бәя бирә, ә ир-атлар алай түгел. Кайберсенең өс-башы да чиста түгел, әмма ни өчендер алар “принцесса Дианага” карап, мин аны үземнеке итә алам дип уйлыйлар. Беркемне дә үпкәләтәсе килми, бу гомуми күзәтү. Яхшы, тәрбияле егетләр батырлыкларын җыеп, беренче адым ясый алмыйча да кала. Бер кызыклы фикергә тап булдым әле: психик яктан сәламәт булган кешеләр кире кагуны бер тапкырдан ук кабул итә икән. 

– Без психология белән артык мавыгып китмибезме икән?
– Анысы белән дә килешәм. Хәзер бөтен кеше акыл өйрәтә. Йолдызнамә буенча ниндидер нәтиҗәләр ясаучылар да бихисап. Хәтта бер үк көнне туган кешеләр дә холыклары буенча бөтенләй төрле бит. Бөтен әйбергә дә аек акыл белән карарга кирәк. Гаилә кору мәсьәләсе, әлбәттә, әти-әниләрне борчый. Кияүгә чыгып була ул, ә менә парлы тормышның никадәр гомерле, озакка сузылуы икенче мәсьәлә. 

– Социаль челтәрләрдә урнаштырган шаян видеоларыңа егетләр үпкәләмиме? 
– Юморга юмор итеп карый белергә кирәк. Мин бит төгәл бер кеше турында сөйләмим, гомумиләштереп әйтәм. Әйе, кызлар арасында да, егетләр арасында да төрле кешеләр бар. Үпкә белдерүчеләр күп очракта шул видеоларда сурәтләнгән образларга туры килүчеләр. Әгәр нәрсәдер ошамый икән, димәк, үтәсең дә китәсең.

– Кешеләрне рәнҗетүдән курыкмыйсыңмы?
– Мин ул хакта күптән түгел генә уйландым әле. Шаян видеоны бөтенләй башка төсмердә күтәреп алып, мине дә хурлап була бит. Кешеләрне начарлыкка да өндәмим инде. 

– Журналистларның эше белән үзең дә таныш. Безнең эш процессын хокукый яктан көйли торган документлар бар. Ә блогерларга кагылышлы әлегә төгәл әйбер юк. Социаль челтәрләргә хокук керсә, контент үзгәрәчәкме?
– Видеоязмалар үзгәрмәячәк, әмма блогерлар үзләрен бераз тыеп эшли башлар дип уйлыйм. Мин болай да провокацион темаларга алынмыйм. Кешеләрнең кәефе үзгәреп тора торган чор. Авыруларга ярдәм җыю мәсьәләсенә дә катгый карыйм. Таныш-белешләр булса гына шәхси сәхифәмә урнаштырам, чөнки кешене ялганлап акча җыючылар күбәйде. Йөрәк әрни, ярдәм дә итәсе килә, әмма дөреслекне белмичә эшләп тә булмый. 

– Хәзер социаль челтәрләрдә интим темалар күтәрү, ачык булу хуплана кебек. Син моңа нинди карашта?
– Таяк һәрвакыт ике башлы. Беренчедән, яхшы, әлбәттә. Без синең белән, мәсәлән, төрле темага утырып сөйләшә алабыз ди. Ә кемдер эчке кичерешләрен якыннарына әйтә алмый. Социаль челтәрләр бу очракта ярдәм итә. Икенче яктан, интим темаларга сөйләшүчеләр күбәйде. Һәркемнең үз дөреслеге, шуңа күрә мәгълүматны кат-кат тикшерергә киңәш итәм. Миңа интим темаларга ачыктан-ачык сөйләшү ошый, әмма ул итагатьле форматта булырга тиеш.

– Гүзәлия, үзеңә катгый карыйсыңмы?
– Үземне ничек бар шулай кабул итәм. “Нишләп алай эшләмәдем икән?” – дип уйланып, үземне җафаламыйм. Борчыла башласам, мин авырыйм. Эш мәсьәләсенә килгәндә, әйе, таләпчән.