«Аллаһы Тәгалә бар, ышанырга кирәк, дидем. Белгән догаларымны укыйм»

Абдулла тумышы белән Азнакайдан. Армиядә хезмәт иткәннән соң Алабугага күчеп килгән, өйләнгән. 2022 елда алгы сызыкка киткән. Шул вакыттан инде өченче ел киткән. Бүген геройның күкрәген өч бүләк бизи. II дәрәҗә «Батырлык өчен» медале «Үгез» (Бык) дип аталган урман полосасын штурмлаган өчен бирелгән.

"Анда каршы як урнашкан иде. Ахыр чиктә бик күп хәрбиләрен югалтты. Без урман полосасын югалтуларсыз алдык. Моның өчен Дәүләт бүләге бирелде", - дип сөйләгән бу хакта хәрби.

Тагын аның «Батырлык» («Отважный») күкрәк медале һәм махсус хәрби операциядә катнашучы медале бар. Ләкин Абдулла аларга әллә ни әһәмият бирми. «Хәрби өчен гадәти эш», - ди ул.

Алгы сызыкта хәрбигә якыннары турындагы уйлар ярдәм итә. "Өйдә хатыным һәм балалар көтә. Җае чыкса, шалтыраталар. Хатлар язалар. Кайвакыт өч айга алгы сызыкка кереп китәбез һәм өч ай тынлык. Моңа түзеп яшәве кыен. Килеп чыкса, хезмәттәшләрем аша исән-сау икәнлегемне хәбәр итәм. Безнең взвод хәрбиләренең хатыннары үзара аерым төркемдә аралаша", - ди ул.

Битараф булмаган алабугалылар җыйган ярдәм адресатларга барып җитә. «Өйдән килгән бөтен нәрсә сөендерә. Мәсәлән, тозлы кыяр, помидор, салатлар, чәк-чәк. Балалар хатлары да килә. Аларны укыйсың да, кайчак хәтта күз яшьләре дә пәйда була. Кайберләре шундый җылы һәм күңелне нечкәртә торган», — ди сөйли Абдулла.

Яраланганнан соң Абдулла дингә килгән. "Баш өстеннән сиксәнле минометка снаряды үтеп китте. Куркыныч булды. Аллага шөкер, шартламады. Шуннан соң мин үз-үземә: «Аллаһы Тәгалә бар, ышанырга кирәк, дидем. Белгән догаларымны укыйм», - дип аңлата хәрби.