Казанлыларның түләү бурычлары 1 миллиард сумга якынлаша...

Эшлиселәр күп әле
– Җәйнең кызган чагы – кышка, беренче чиратта, җылыту сезонына әзерләнү эшләрен башкарырга иң кулай вакыт. Халыкның елның салкын көннәрендә үзен уңайлы хис итүе безнең бүген никадәр яхшы әзерлек башкаруыбызга бәйле, – диде Казан шәһәр Башкарма комитеты җитәкчесе Рөстәм Гафаров, кышка әзерлекнең җаваплы бурыч икәнлеген искәртеп.

Шәһәр штабына 16 мең бинаның кышка әзерлегенә бәя бирергә туры киләчәк. Болар: күп фатирлы 6003 йорт, аларның 5560ы үзәкләштерелгән җылылык челтәренә тоташтырылган. Тагын 443 шәхси йортка хезмәт күрсәтелә. Башкаладагы торак йортларның 16 сентябрьгә кышка әзерлек паспортлары инде булырга тиеш.
– Социаль биналар һәм күп фатирлы йортлар, һәрвакыттагыча, безнең игътибар үзәгендә. Алар 6 меңнән артык. Әлеге йортларның һәркайсында безнең гражданнар яши. Шунлыктан бездән зур җаваплылык тоеп, актив рәвештә эштә катнашу таләп ителә, – диде Рөстәм Гафаров. 

Шәһәр Башкарма комитеты җитәкчесе урынбасары Искәндәр Гыйниятуллин таныштырганча, күп фатирлы йортларны җылыту чорына әзерләү Авиатөзелеш һәм Яңа Савин районнарында 41 процентка, Вахитов һәм Идел буе районнарында 34,5 процентка,Киров һәм Мәскәү районнарында 25,7 процентка, Совет районында 48,2 процентка башкарылган.

Бушлай тормыш – әкияттә
– Казанлыларның торак-коммуналь хезмәтләр өчен идарәче компанияләргә түләү бурычлары 1 миллиард сумга якын. Бу идарәче компанияләрнең чыганаклар белән тәэмин итүче оешмалар алдындагы түләү бурычларыннан шактый күбрәк. Финанс чыганакларының вакытында кереп җитмәве сәбәпле, идарәче компанияләр тиешле санда кадрлар кабул итә һәм яхшы хезмәт хакы билгели алмый. Норматив буенча 2,2 мең кеше кирәк булса, ишегалды җыештыручылар саны 1453 кенә. Хезмәт колачы артканлыктан, кышка кергәндә эшче куллар 20 процентка кадәр кимергә мөмкин, – диде Искәндәр Гыйниятуллин “эшлекле дүшәмбе” киңәшмәсендә.

Карны булмый борып
Казан мэры Илсур Метшин:”Күктән яуган карны шәһәр өстеннән борып җибәрү технологиясе әле уйланылмаган, шунлыктан карны җыештырырга туры килә”, – дип әйткән иде шәһәр хакимиятендәге җыелышларның берсендә. Гамәлдәге тарифларда ишегалдыннан җыештырылган карны чыгаруга финанс чыганаклары каралмаган. Нәтиҗәдә ул идарәче компанияләргә өстәмә чыгым булып төшә. Идарәче компанияләр ишегалдындагы карны чыгаруны торак милекчеләре белән бергәләшеп оештырырга тәкъдим итә. Кайбер йортлар ишегалды карын чыгару өчен өстәмә акча җыеша.
– Беренче чиратта торак-коммуналь хезмәтләр өчен үзвакытында түләү башкарылсын иде. Түләү һәм бурычларны каплау – гражданнарның йөкләмәсе ул. Сорау куярга гына түгел, чишелешне дә идарәче компанияләр белән бергәләшеп табу зарур, – диде Искәндәр Гыйниятуллин, казанлыларга мөрәҗәгать итеп.

Казанда идарәче компанияләр күп фатирлы 4,2 мең йортка хезмәт күрсәтә. Йорт яны территорияләренең гомум мәйданы 22 миллион квадрат метр.